Efelychu Clinigol ar y Campws

Mae myfyrwyr yn paratoi ar gyfer ymarfer yn ein Canolfan Efelychu. Mae’n efelychu lleoliadau ysbyty a chymuned i ddarparu hyfforddiant ymarferol mewn senarios chwarae rôl. Yma, byddwch yn ymdrin â phopeth o sgiliau clinigol hanfodol i senarios clinigol amlddisgyblaeth cymhleth. Byddwch yn defnyddio’r un offer ag y byddwch yn eu gweld mewn lleoliadau gofal iechyd, ac yn dibynnu ar y senario, byddwch yn gweithio gydag actorion ac efelychwyr cleifion sy’n efelychu adwaith y corff i salwch, gofal a thriniaeth.

Mae rhan o’r Ganolfan wedi’i hymrwymo i addysgu bydwreigiaeth a sgiliau gofal plant. Mae gennym efelychwyr genedigaeth a mamol datblygedig sy’n efelychu gwahanol gamau beichiogrwydd, a senarios cysylltiedig gan gynnwys yr enedigaeth, a chyflwyniadau ffolennol.

Profiad Gwaith dan Oruchwyliaeth a Chymorth

Bydd 50% o’ch astudiaethau yn digwydd mewn practis clinigol – byddwch yn gweithio gyda chleientiaid go iawn ochr yn ochr ag ymarferwyr i fod yn barod i weithio.

Rydym yn gweithio’n agos â phartneriaid practis y Bwrdd Iechyd a darparwyr annibynnol ledled Cymru i ddarparu cyfleoedd profiad gwaith amrywiol. Bydd disgwyl i chi fynd ar brofiad gwaith mewn nifer o fyrddau iechyd lleol sy’n para sawl wythnos ar y tro, mewn amrywiaeth o leoliadau.

Ar brofiad gwaith, byddwch yn gweithio ochr yn ochr ag ymarferwyr cofrestredig i ddarparu gofal i ddefnyddwyr gwasanaeth ag anghenion gofal cymhleth a lluosog. Caiff mentor ei benodi i chi a chewch eich cefnogi drwy gydol pob profiad gwaith. Mae myfyrwyr nyrsio a bydwreigiaeth yn mwynhau cymorth eithriadol yn PDC. Mae ein polisi drws agored yn sicrhau bod rhywun wrth law drwy’r amser i’ch cynorthwyo os bydd problem yn codi ac mae ein myfyrwyr yn gwerthfawrogi hyn yn fawr.

Cymhwyster Proffesiynol

Mae PDC yn Sefydliad Addysg Cymeradwy gan y Cyngor Nyrsio a Bydwreigiaeth. Gall graddedigion o’n cyrsiau Bydwreigiaeth a Nyrsio ymgeisio i ymuno â chofrestr gweithwyr proffesiynol y Cyngor Nyrsio a Bydwreigiaeth a dechrau ymarfer yn y DU.

Mae ein graddau’n darparu’r cymysgedd iawn o wybodaeth, sgiliau a phrofiad i’ch paratoi ar gyfer heriau gofal iechyd modern. Mae cyflogwyr yn awyddus i recriwtio ein graddedigion gan eu bod yn gwybod eu bod wedi’u paratoi’n dda, ac yn ymarferwyr hyderus, cymwys a diogel.

Rydym yn cynnig graddau ym mhedair cangen Nyrsio, ac mae cyrsiau’n dechrau ym mis Medi a mis Ebrill bob blwyddyn. Gallwch gymhwyso fel nyrs drwy wahanol lwybrau yn PDC, nid cyrsiau gradd israddedig amser llawn yn unig. Rydym hefyd yn cynnig cwrs nyrsio rhan-amser hyblyg, sy’n rhoi cyfle i weithwyr cymorth gofal iechyd profiadol ddod yn Nyrs Gofrestredig wrth barhau i weithio ac ennill. Neu os oes gennych radd eisoes, gallwch gymhwyso drwy astudio Diploma Ôl-raddedig mewn Nyrsio am ddwy flynedd.